კეისონ უოლესი – $139 მილიონი: 2023 წლის დრაფტის გაგრძელებები

NBA-ში დღეს, 19 ოქტომბერს, რუკი კონტრაქტების გაგრძელების ბოლო ვადა იწურება. 2023 წლის დრაფტის პირველი რაუნდის მოთამაშეებს ახალი ხელშეკრულების გაფორმება ცენტრალური დროით 17:00-მდე (თბილისით სამშაბათს 02:00-მდე) შეუძლიათ. ვინც ვერ მოასწრებს, 2027 წლის ზაფხულში შეზღუდული თავისუფალი აგენტი გახდება.

კეისონ უოლესი ოკლაჰომა სიტი თანდერი · 2026-27 სეზონი 6.0 ქულა 3.0 მოხსნა 2.0 პასი პროფილი ›

უოლესი – თანდერის ახალი მილიონერი

ბოლო დიდი გარიგება კვირას გვიან ღამით დაიდო: ოკლაჰომა სიტი თანდერი და კეისონ უოლესი ხუთწლიან, 139 მილიონი დოლარის ღირებულების გაგრძელებაზე შეთანხმდნენ. ამის შესახებ ESPN-ის შამს შარანიამ გაავრცელა ინფორმაცია. წლიურად ეს დაახლოებით 27.8 მილიონს შეადგენს.

22 წლის გარდამცველი გასულ სეზონში ლიგაში ლიდერი იყო ჩაჭრების საერთო რაოდენობით (150), მოხვდა მეორე სიმბოლურ დაცვით ხუთეულში და საუკეთესო დამცველის ხმის მიცემაში მეშვიდე ადგილი დაიკავა. ლუ დორტის ატლანტაში გაცვლის შემდეგ უოლესი, სავარაუდოდ, სასტარტო ხუთეულში დაიმკვიდრებს ადგილს. Hoops Rumors-ის თანახმად, ამით თანდერის ხუთივე სასტარტო მოთამაშე მრავალწლიანი კონტრაქტით არის დაკავებული.

ვინ უკვე მოაწერა ხელი

• ვიქტორ ვემბანიამა (სან ანტონიო სპერსი) – 5 წელი, მაქსიმალური კონტრაქტი
• ამენ ტომპსონი (ჰიუსტონ როკეტსი) – 5 წელი, $208 მლნ
• კეიონტე ჯორჯი (იუტა ჯაზი) – 5 წელი, $157.5 მლნ
• ოსარ ტომპსონი (დეტროიტ პისტონსი) – 5 წელი, $155 მლნ
• კეისონ უოლესი (ოკლაჰომა სიტი თანდერი) – 5 წელი, $139 მლნ
• ბრენდინ პოძიემსკი (გოლდენ სტეიტ უორიორსი) – 5 წელი, $110 მლნ, მეხუთე წელს ორმხრივი ოფციით

პოძიემსკიმ გასულ სეზონში კარიერის რეკორდული 13.8 ქულა დააგროვა და უორიორსიდან ერთადერთმა ითამაშა 82-ვე მატჩში. „ის გამძლე, ოსტატური და ორივე მხარეს მოთამაშე კალათბურთელია“, – აღნიშნა გენერალურმა მენეჯერმა მაიკ დანლივიმ.

ბრენდონ მილერი – მთავარი ინტრიგა

ბოლო საათებში ყველაზე დიდი ყურადღება შარლოტ ჰორნეტსის ფორვარდ ბრენდონ მილერზეა. Bleacher Report-ის ჯეიკ ფიშერი ჯერ კიდევ სექტემბერში იტყობინებოდა, რომ ჰორნეტსი მას ამენ ტომპსონის კონტრაქტის დონის შეთავაზებას მოუმზადებდა. მარკ სტაინის ცნობით კი, მილერი გაგრძელების კანდიდატად რჩება. პუბლიკაციის მომენტისთვის ხელმოწერა ოფიციალურად არ დადასტურებულა.

ორლანდო მეჯიქი, სტაინის თქმით, ენტონი ბლეკისთვის კონტრაქტის გაგრძელებას არ აპირებს ხელფასების ფონდის გამო. სავარაუდოდ, ის მომავალ ზაფხულს შეზღუდული თავისუფალი აგენტი გახდება.