ამ დღეს 80 წლის წინ: ნიქსმა ტორონტოში NBA-ის ისტორიის პირველი მატჩი 68:66 მოიგო

1946 წლის 1 ნოემბერს ტორონტოს არენაზე „მეიპლ ლიფ გარდენსი“ 7 090 მაყურებელი შეიკრიბა. ადგილობრივმა ჰასკისმა ნიუ-იორკის ნიკერბოკერსს უმასპინძლა. ეს იყო ახალი ლიგის, BAA-ის (Basketball Association of America), პირველი მატჩი. 1949 წელს, NBL-თან გაერთიანების შემდეგ, ლიგას NBA ეწოდა, ამიტომ NBA ამ თამაშს საკუთარი ისტორიის პირველ მატჩად მიიჩნევს.

ალენ აივერსონი ფილადელფია სიქსერსი · 2009-10 სეზონი 13.8 ქულა 2.8 მოხსნა 4.0 პასი პროფილი ›

მატჩი ნიქსმა 68:66 მოიგო. ლიგის ისტორიაში პირველი კალათი ოსი შექტმანმა ჩააგდო, რომელმაც სულ 11 ქულა დააგროვა. ნიქსის საუკეთესო ბომბარდირი ლეო გოტლიბი იყო 14 ქულით. ჰასკისში ყველაზე მეტი, 18 ქულა, ედ სადოვსკიმ ჩააგდო, ჯორჯ ნოსტრანდმა კი 16 დაამატა.

უფასო ბილეთი მაღალი მაყურებლებისთვის

ახალი ლიგა მაყურებლის მოზიდვას ყველანაირად ცდილობდა. ჰასკისმა გამოაცხადა, რომ 6 ფუტ 8 დიუმზე (დაახლოებით 203 სმ) მაღალი ყველა მაყურებელი მატჩს უფასოდ ნახავდა. სარეკლამო აფიშაზე გუნდის მაღალი ცენტრი, ჯორჯ ნოსტრანდი, იყო გამოსახული. დანარჩენებისთვის ბილეთი 75 ცენტიდან 2.50 დოლარამდე ღირდა.

მეორე დღეს გაზეთებმა მატჩის სტატისტიკიდან მხოლოდ კალათები, საჯარიმო ტყორცნები და ქულები გამოაქვეყნეს. სამქულიანი ხაზი NBA-ში მხოლოდ 1979-80 წლების სეზონში გაჩნდა.

ჰასკისი გაქრა, ნიქსი დარჩა

ჰასკისი მხოლოდ ერთ სეზონს არსებობდა და შემდეგ დაიშალა. იმ მატჩის მონაწილეებიდან დღესაც მხოლოდ ნიქსი თამაშობს. ტორონტოს NBA-ის გუნდი კვლავ 1995 წელს გაუჩნდა, როცა რეპტორსი დაარსდა.

80 წლის შემდეგ, ისევ 1 ნოემბერს, ტორონტოს გუნდი კვლავ მოედანზე გადის: რეპტორსი თბილისის დროით დილის 06:00-ზე ლეიკერსს შეხვდება, რომელშიც სანდრო მამუკელაშვილი თამაშობს. ქართველი წინა სეზონში სწორედ რეპტორსის წევრი იყო.

იმავე დღეს, 50 წლის შემდეგ: აივერსონის დებიუტი

1 ნოემბერი NBA-ის ისტორიაში კიდევ ერთი დებიუტით არის ცნობილი. 1996 წელს ამ დღეს ალენ აივერსონმა ლიგაში პირველი მატჩი ითამაშა და სიქსერსის შემადგენლობაში 30 ქულა დააგროვა. მან 19 ტყორცნიდან 12 ჩააგდო, სამქულიანებიდან კი 4-დან 2. ამას 6 შედეგიანი გადაცემა დაამატა. სიქსერსმა ბაქსთან 103:111 წააგო, აივერსონი კი იმ სეზონის ბოლოს წლის საუკეთესო ახალბედად დასახელდა.