დონჩიჩის 308 ქულა რვა მატჩში: ასეთი სტარტი ჯორდანის შემდეგ არავის ჰქონია

ლუკა დონჩიჩმა საკრამენტოში 40 ქულა ჩააგდო და ლეიკერსმა კინგსი 116:103 დაამარცხა. ეს მისი ზედიზედ მეექვსე მატჩია, რომელშიც მინიმუმ 35 ქულა დააგროვა. სეზონის პირველ რვა მატჩში დონჩიჩს უკვე 308 ქულა აქვს.

ლუკა დონჩიჩი ლოს ანჯელეს ლეიკერსი · 2026-27 სეზონი 38.3 ქულა 8.0 მოხსნა 8.1 პასი პროფილი ›

რვა მატჩში 300 ქულას ბოლოს მაიკლ ჯორდანმა გადააჭარბა: 1988-89 სეზონში მას 303 ქულა ჰქონდა. დონჩიჩზე მეტი სეზონის პირველ რვა მატჩში მხოლოდ ვილტ ჩემბერლენს დაუგროვებია. მან ეს სამჯერ შეძლო, მისი რეკორდი კი 418 ქულაა (1962-63 სეზონი).

დონჩიჩის ქულები სეზონში ასეთია: 28, 23, 52, 41, 37, 45, 42 და 40. საშუალოდ ეს 38.5 ქულაა, ბოლო ექვს მატჩში კი 42.8. ლეიკერსის ცხრა მატჩიდან მან მხოლოდ ერთი გამოტოვა.

ამ მატჩში დონჩიჩმა 35 წუთი ითამაშა და 11/23 ტყორცნა, 6/13 სამქულიანი და 12/13 საჯარიმო შეასრულა. მან 9 მოხსნა და 7 შედეგიანი გადაცემა დაამატა, თუმცა 6 ბურთი დაკარგა. ოსტინ რივზმა 21 ქულა ჩააგდო.

მესამე მეოთხედის ბოლოს უსიამოვნო ეპიზოდი მოხდა. ბურთი მოედნიდან გავიდა, ერთმა გულშემატკივარმა კი ის აგრესიულად ესროლა მსაჯს. დონჩიჩმა მაშინვე მიუთითა მასზე და, როგორც ჩანს, რაღაც უთხრა. დაცვამ გულშემატკივარი ადგილიდან წაიყვანა.

ლეიკერსმა ზედიზედ მესამე მატჩი მოიგო და შედეგი 7-2 გახადა. ამავე მატჩში სანდრო მამუკელაშვილმა 19 წუთი ითამაშა და 6 მოხსნა დააგროვა, მისი პლიუს-მინუსი კი +17 იყო. მომდევნო მატჩს ლეიკერსი 7 ნოემბერს, თბილისის დროით 07:00-ზე, შინ ბლეიზერსთან ითამაშებს.