ლუკა დონჩიჩის 53 ქულა: ზედიზედ ოთხი 40-ქულიანი მატჩი და ადგილი ლეიკერსის ისტორიაში

ლუკა დონჩიჩმა ბლეიზერსთან მატჩში 53 ქულა ჩააგდო და ლეიკერსს 124:118 გამარჯვება მოუტანა. ლუკამ 38 წუთში 33 ტყორცნიდან 17 ჩააგდო, სამქულიანებში 15-დან 5, საჯარიმოებში კი 18-დან 14. მას ასევე 5 მოხსნა და 5 შედეგიანი გადაცემა აქვს.

ლუკა დონჩიჩი ლოს ანჯელეს ლეიკერსი · 2026-27 სეზონი 38.5 ქულა 8.1 მოხსნა 8.0 პასი პროფილი ›

ეს დონჩიჩის სეზონის საუკეთესო შედეგია. მანამდე მისი რეკორდი 52 ქულა იყო, რომელიც ოქტომბრის ბოლოს ჯაზთან დააგროვა. კარიერაში ლუკას 50-ქულიანი მატჩი უკვე 11 აქვს, ლეიკერსის ფორმით კი 4.

ბეილორი, ბრაიანტი, მაიკანი და დონჩიჩი

დონჩიჩმა 40 ან მეტი ქულა ზედიზედ მეოთხე მატჩში ჩააგდო: 45 რეპტორსთან, 42 ჰიტთან, 40 კინგსთან და ახლა 53 ბლეიზერსთან. ლეიკერსის ისტორიაში რეგულარულ სეზონში ასეთი სერია მანამდე მხოლოდ სამ მოთამაშეს ჰქონდა: ელგინ ბეილორს, კობი ბრაიანტსა და ჯორჯ მაიკანს.

ლუკამ ლეიკერსში 40-ქულიანი მატჩების რაოდენობით მაიკანსაც გადაასწრო და ამ სიაში მეხუთე ადგილზე ავიდა. ამისთვის მას ლეიკერსის ფორმით რეგულარული სეზონის 101 მატჩი დასჭირდა. ბოლო შვიდ მატჩში მან ექვსჯერ ჩააგდო 40 ან მეტი ქულა.

ამ სეზონში დონჩიჩს 9 მატჩში 361 ქულა აქვს, ანუ საშუალოდ 40.1 ქულა თითო მატჩში.

ტყორცნა მოედნის მეორე ნახევრიდან

მატჩი ლუკასთვის ადვილად არ დაწყებულა: პირველი ხუთი სამქულიანი მან ვერ ჩააგდო. სამაგიეროდ, პირველი ნახევრის ბოლო წამზე დონჩიჩმა ბურთი მოედნის მეორე ნახევრიდან, დაახლოებით 19 მეტრიდან, ფარის დახმარებით ჩააგდო.

მესამე მეოთხედში დონჩიჩმა 20 ქულა ჩააგდო, მეტი, ვიდრე მთელმა ბლეიზერსმა ამ მეოთხედში (15). სწორედ ამ მონაკვეთში შემობრუნდა მატჩი. ამავე მატჩში სანდრო მამუკელაშვილის პლიუს-მინუსი +19 იყო.

ლეიკერსი შემდეგ მატჩს ორშაბათს, 9 ნოემბერს, 03:00 საათზე დეტროიტში პისტონსთან ითამაშებს.