„კევინ ლავს მაგონებს“: კოლინ სექსტონი სანდრო მამუკელაშვილს აქებს

სანდრო მამუკელაშვილი ლეიკერსის წინასეზონის ერთ-ერთი საუკეთესო მოთამაშე იყო. ქართველმა ფორვარდმა მოედანზე სწორედ ის მრავალმხრივობა აჩვენა, რის გამოც კლუბმა ზაფხულში, თავისუფალი აგენტების ბაზარზე, მასთან მსხვილი კონტრაქტი გააფორმა.

სანდრო მამუკელაშვილი ლოს ანჯელეს ლეიკერსი · 2025-26 სეზონი 11.2 ქულა 4.9 მოხსნა 1.9 პასი პროფილი ›

მამუკელაშვილს მოედანზე თითქმის ყველაფერი შეუძლია: კარგად ისვრის, ბურთს ატარებს, გადაცემებს აკეთებს და მოხსნებისთვისაც იბრძვის. ეს ახლოდან ნახა კოლინ სექსტონმაც, რომელმაც მთელი წინასეზონი ფეხის ტრავმის გამო გამოტოვა. მამუკელაშვილის თამაშის ყურებისას სექსტონს კავალიერსში ყოფილი თანაგუნდელი, კევინ ლავი გაახსენდა.

„ვფიქრობ, ის იმ მოთამაშეებს შორისაა, ვისაც ბევრი რამ შეუძლია. სროლის მანერით კევინ ლავს მაგონებს“, - თქვა სექსტონმა. „ბევრ ქულას აგროვებს. ძალიან კარგად ისვრის, პიკ-ენ-პოპში თამაშობს, კალათთან ზურგით თამაშიც შეუძლია და გადაცემაც. ძალიან მაგონებს კ-ლავს, რომელთანაც ერთად ვთამაშობდი. მაგარია, როცა გვერდით გყავს მოთამაშე, ვისთანაც პიკ-ენ-პოპს თამაშობ, მაგრამ თუ საჭიროა, ის სამწამიან ზონაშიც შედის“.

შედარება იდეალური არ არის, თუმცა მამუკელაშვილსა და ლავს ბევრი საერთო აქვთ: ორივე მაღალი მოთამაშეა და ორივეს შორიდან სროლა შეუძლია. ლეიკერსს ამ სეზონში სწორედ ამ თვისების იმედი აქვს. სავარაუდოდ, მამუკელაშვილი და სექსტონი გუნდის მეორე ხუთეულის ლიდერები იქნებიან. მათ წინაშე ამოცანაა, გააძლიერონ სათადარიგოთა სკამი, რომელიც გასულ სეზონში ლიგის ერთ-ერთი ყველაზე სუსტი იყო.

რედიკი მამუკელაშვილს ტემპის აწევას სთხოვს

კევინ ლავი დაცვაში მოხსნის შემდეგ გრძელი, ზუსტი გადაცემებით იყო ცნობილი და ამ მხრივ NBA-ს ისტორიაში ერთ-ერთ საუკეთესოდ ითვლება. მამუკელაშვილი ამ დონეზე შეიძლება არ იყოს, მაგრამ სწრაფ შეტევაში ის განსაკუთრებით სახიფათოა. მთავარ მწვრთნელს, ჯეი-ჯეი რედიკს სურს, რომ მოხსნის შემდეგ ქართველმა ფორვარდმა ტემპი თავად აწიოს და შეტევა თვითონ წამოიწყოს.

„დიახ, ვფიქრობ, ის ძალიან სწრაფად იღებს გადაწყვეტილებებს“, - თქვა რედიკმა წინასეზონის ბოლო მატჩის შემდეგ, რომელიც ლეიკერსმა ნაგეტსთან ითამაშა. „მოედანზე სივრცე კარგად გვაქვს განაწილებული, ის კი გუნდში შემაკავშირებელი რგოლია. განსაკუთრებით ვუბიძგებთ, რომ დაცვაში მოხსნის შემდეგ სწრაფი შეტევა თავად წამოიწყოს, რადგან მას შეუძლია ჩვენი ტემპის აწევა და სწორი გადაწყვეტილებების მიღება“.

„თუმცა წინასეზონში გუნდების უმეტესობა მეურვეობის გაცვლით თამაშობდა, ამიტომ მას მხოლოდ ცენტრი არ იცავდა და ყოველთვის პიკ-ენ-პოპით ვერ სარგებლობდა. არათანაბარ დაპირისპირებებს კარგად ვამჩნევთ, მისი უნარი კი, მაშინვე მომდევნო მოქმედებაზე გადავიდეს, ძალიან კარგი იყო“.

მამუკელაშვილის სტატისტიკას სეზონის განმავლობაში nba.ge-ზე, მის პირად გვერდზე შეგიძლიათ თვალი ადევნოთ.