მამუკელაშვილის ლეიკერსი მილუოკიში ბაქსს შეხვდება, ბითაძის მეჯიქი იუტაში ითამაშებს

ხვალ დილით ორივე ქართველი მოთამაშის გუნდი ითამაშებს. სანდრო მამუკელაშვილის ლეიკერსი თბილისის დროით 05:00-ზე მილუოკიში ბაქსს ეთამაშება. გოგა ბითაძის მეჯიქი კი 06:00-ზე იუტაში ჯაზს შეხვდება.

გოგა ბითაძე ორლანდო მეჯიქი · 2026-27 სეზონი 3.7 ქულა 3.4 მოხსნა 0.6 პასი პროფილი ›

ორივე მეტოქე სეზონს ძალიან ცუდად იწყებს. ბაქსის მაჩვენებელი 1-10-ია, ჯაზისაც 1-10. ბაქსს ზედიზედ შვიდი წაგება აქვს, ჯაზს კი ზედიზედ ცხრა.

ლეიკერსი - ბაქსი

ლეიკერსის მაჩვენებელი 10-2-ია და გუნდი დასავლეთის კონფერენციის პირველ ადგილზეა. გუნდმა ზედიზედ ექვსი მატჩი მოიგო. ლუკა დონჩიჩი საშუალოდ 39.3 ქულას აგროვებს და ლიგის საუკეთესო ბომბარდირია. ლეიკერსში კვენტინ გრაიმზის მონაწილეობა საეჭვოა.

მამუკელაშვილმა სეზონის 12-ვე მატჩში ითამაშა. საშუალოდ ის მოედანზე 23.5 წუთს ატარებს და 9.8 ქულასა და 4.6 მოხსნას აგროვებს. სეზონის საუკეთესო შედეგი, 23 ქულა და 5 სამქულიანი, სანდრომ ბოლო მატჩში, ატლანტაში ჰოუქსთან აჩვენა.

მილუოკი სანდროსთვის ნაცნობი ქალაქია: 2021-2023 წლებში ის ბაქსში თამაშობდა. ბაქსში ამჯერად არ ითამაშებს ტაილერ ჰიროუ, გუნდის საუკეთესო ბომბარდირი. ლეიკერსი შემდეგ მატჩს 16 ნოემბერს, 01:00-ზე, ფინიქსში სანსთან ითამაშებს.

მეჯიქი - ჯაზი

მეჯიქმა დღეს დილით საკრამენტოში კინგსი 107:100 დაამარცხა. ამ გამარჯვებით გუნდმა ზედიზედ ოთხი წაგების სერია შეწყვიტა. ბითაძემ ამ მატჩში სეზონში ყველაზე მეტი, 15 წუთი ითამაშა და 2 ქულა, 2 მოხსნა, 1 შედეგიანი გადაცემა და 1 ბლოკ-შოტი დააგროვა.

ბითაძემ სეზონში 8 მატჩი ითამაშა. საშუალოდ ის 9.5 წუთში 3.5 ქულასა და 3.3 მოხსნას აგროვებს. მეჯიქში კვლავ არ ითამაშებენ პაოლო ბანკერო, ჯალენ საგსი, ჯონათან აიზეკი და ტრისტან და სილვა.

ჯაზს ტრავმების გამო ოთხი ძირითადი მოთამაშე აკლია: ლაური მარკანენი, კეიონტე ჯორჯი, იუსუფ ნურკიჩი და ჯარენ ჯექსონ-უმცროსი. იუტის შემდეგ მეჯიქი 14 ნოემბერს, 04:00-ზე, ორლანდოში ბაქსს უმასპინძლებს.