1657847433

ევროპაში 2022 წელს უჩვეულოდ ცხელი ზაფხულია : FIBA-ს 2023 წლის მსოფლიოს ჩემპიონატისთვის შესარჩევი ეტაპის ბოლო რაუნდი და მზადება - Eurobasket 2022-სთვის, რომლის ჯგუფური ეტაპის მასპინძლებიც თბილისი, კიოლნი, პრაღა, ბუდაპეშტი, ტალინი, მილანი და ლუბლიანაა, ხოლო ფინალური ეტაპი ბერლინში გაიმართება.წარმოგიდგენთ, ჩვენი გადმოსახედიდან 20 გამორჩეულ ევროპელ მოთამაშეს, რომელთა მიმართაც განსაკუთრებული ყურადღება იქნება მიმართული 2022 წლის ზაფხულსა და შემოდგომაზე.20)სებასტიან სეიზი (ესპანეთი)სებასტიან სეიზი ესპანეთის ახალი ფორმაციის ნაკრების ერთ-ერთი გამორჩეული წევრია და მას საუკეთესო სტატისტიკური მაჩვენებელი აქვს როგორც ფიბას მსოფლიოს ჩემპიონატის შესარჩევი ეტაპის მატჩებზე, აგრეთვე ევრობასკეტის საკვალიფიკაციო ეტაპზე. სეიზი ესპანეთთან ერთად თბილისში ეცდება მომდევნო ეტაპზე გადასასვლელად იბრძოლოს და მსოფლიოს მოქმედ ჩემპიონებს წარმატება მოუტანოს კონტინენტის პირველობაზეც. 19)იონას ვალანჩუნასი (ლიეტუვა)30 წლის ვალანჩუნასი NBA-ში New Orleans Pelicans-ის ღირსებას იცავს და მისი საშუალო სტატისტიკა წელს : 17.8 ქულა, 11.4 მოხსნა და 2.5 გადაცემა იყო. ლიეტუველი ცენტრი საკმაოდ კარგ ფორმაშია და ფიბას ოფიციალური გვერდისთვის მიცემულ ინტერვიუში აღნიშნა, რომ ელოდება ევრობასკეტის დაწყებას, რადგან თვლის, რომ მისი ქვეყნის გუნდი დიდი მიზნებისთვის იბრძოლებს. 18)დენი ავდიჯა (ისრაელი) 21 წლის სერბული წარმოშობის ავდიჯა პოზიციით მსროლელია. ის ერთ-ერთი ამომავალი ახალგაზრდა ვარსკვლავია , რომელმაც თავის დამკვიდრება მოახერხა როგორც Washington Wizzards-ში აგრეთვე ეროვნულ ნაკრებში. ის ამ სიის ყველაზე ახალგაზრდა წარმომადგენელია, რომელსაც ანალიტიკოსები დიდ მომავალს უწინასწარმეტყველებენ . მასთან ერთად ევრობასკეტზე შესაძლოა ნახევრად ქართული წარმომავლობის გაბრიელ ჩაჩაშვილიც ვიხილოთ ისრაელის რიგებში, რომელიც ახლა Golden State Warriors-ის საზაფხულო ლიგის გუნდში თამაშობს.17)გეორგიოს პაპაგანისი (საბერძნეთი)გეორგიოს პაპაგანისი ევროპელი გულშემატკივრისთვის კარგად ნაცნობი მოთამაშეა, რომელსაც არაერთხელ გამოუჩენია თავი როგორც ეროვნული ნაკრების რიგებში, აგრეთვე საკლუბო ჩემპიონატებში. ამ ეტაპზე ის ბერძნული "პანათინაიოკისის" ღირსებას იცავს და ევროლიგის ერთ-ერთი გამორჩეული ვარსკვლავია. პაპაგანისი, თვლის, რომ საბერძნეთი წელს ევრობასკეტის მოგებისთვის იბრძოლებს.16)ჯედი ოსმანი (თურქეთი)ჯედი ოსმანი თურქეთის ნაკრების გამორჩეული მოთამაშე და ლიდერია, რომელიც Cleveland Cavaliers-ის ღირსებას იცავს და მის გუნდში ყველაზე მაღალანაზღაურებადი მოთამაშეა. თურქეთის ნაკრები საკმაოდ ძლიერი შემადგენლობით იქნება დაკომპლექტებული, რადგან მათი ქვეყნის საკლუბო ჩემპიონატი უფრო და უფრო ვითარდება და მოსამზადებელ ეტაპზე მწვრთნელმა არაერთი გამორჩეული ახალგაზრდა გამოიძახა სწორედ თურქული ლიგიდან. შეგახსენებთ, რომ თურქეთიც ჩვენს ჯგუფშია და ევრობასკეტის ჯგუფურ ეტაპზე თბილისში ითამაშებენ ყველა მატჩს. 15)დენის შროდერი (გერმანია)შროდერი გერმანიის ნაკრების მთავარი გამთამაშებელი და სანდოობის გარანტიაა, NBA-ში თითქმის 10 წლიანი გამოცდილებით. 28 წლის გერმანელმა უკვე იასპარეზა ორ ევრობასკეტზე  და აქვს შანსი ითამაშოს გერმანელი ფანების წინაშე ამ ზაფხულს კიოლნში - ხოლო პოტენციურად, ბერლინშიც ფინალურ ეტაპზე . ფლეიმეიკერობის მიუხედავად, შროდერს ასევე შეუძლია ქულების მოპოვებაც, ის 2017 წლის ევრობასკეტზე  მეორე იყო ქულების საშუალო მაჩვენებლით - 23.7 ქულა თითოეულ მატჩში. გერმანიაც წელს ევრობასკეტზე განსაკუთრებული მოტივაციით იბრძოლებს, რადგან როგორც ჯგუფური ეტაპის, ასევე ფინალური ეტაპის თამაშები მათ ქვეყანაში ტარდება. 14)დანილო გალინარი (იტალია)გალინარი ყოველთვის ხარჯავს მაქსიმუმს ეროვნულ გუნდისთვის და იღებს ლიდერის როლს რამდენიმე ნიჭიერ ახალგაზრდასთან ერთად. არაერთ სანაკრებო ტურნირში მონაწილეობის მიუხედავად, 33 წლის ფორვარდს, ჯერჯერობით სანაკრებო ტიტული არ აქვს. გალინარის საშუალო სტატისტიკა, NBA-ის თითოეულ სეზონში 2009 წლიდან, ორმაგ ნიშნულს აღწევს და ის იყო იტალიის ნაკრების ერთ-ერთი მთავარი ძალა 2019 წლის მსოფლიო ჩემპიონატზეც. 13)იუსუფ ნორკიჩი (ბოსნია-ჰერცეგოვინა)იუსუფ ნურკიჩი ბოსნი-ჰერცეგოვინის ლიდერია და როდესაც სანაკრებო პაუზა არ ემთხვევა NBA-ის კალენდარს ის ყოველთვის ნაკრებთან ერთადაა. წელს ნურკიჩის დაბრუნებას აგვისტოში ელოდებიან და დიდი ალბათობით, ევრობასკეტ 2022-ზეც გაუძღვება გუნდს. ნურკიჩს საკმაოდ სტაბილური კარიერა აქვს ლიგაში და მისი საშუალო სტატისტიკა წელს ქულებისა და მოხსნების მიხედვით ორმაგი დუბლი იყო.12)ლაური მარკანენი (ფინეთი)ლაური მარკანენი ეროვნულ ნაკრებში მუდამ გამოირჩევა და ევროპელი გულშემატკივარი მას სხვადასხვა ტურნირებიდან წლებია იცნობს. 25 წლის მძიმე ფორვარდი ამჟამად Cleveland Cavaliers-ის ღირსებას იცავს და 2022 წლის ევრობასკეტზე ეცდება წინა ტურნირზე მე-16 ფინალში გასვლის შედეგი გააუმჯობესოს თავის ნაკრებთან ერთად.11)კრისტაპს პორზინგისი (ლატვია)კრისტაპს პორზინგისს ლატვიის ეროვნულ ნაკრებში 2017 წლის ევრობასკეტის შემდეგ არ უთამაშია, მაგრამ აპირებს დაბრუნდეს ამ ზაფხულს და დაეხმაროს გუნდს მსოფლიო ჩემპიონატის შესარჩევი ეტაპის მეორე რაუნდშიც. 5 წლის წინ ევრობასკეტზე ის საუკეთესო მექულეებს შორის მე-3 ადგილზე იყო და 34 ქულა შეასრულა დაძაბულ მატჩში, სლოვენიის წინააღმდეგ . მისი თამაშის ყურება ყოველთვის სასიამოვნოა ევროპელი გულშემატკივრისთვის და პორზინგისის დაბრუნება ლატვიის ნაკრებისთვისაც დამატებითი მოტივაცია იქნება.10)ივან ფორნიე (საფრანგეთი)ივან ფორნიე იმ კალათბურთელთა შორისა, რომელიც ნაკრებში ბევრად მაღალ დონეზე თამაშობს, ვიდრე კლუბში. 2020 წლის ტოკიოს ოლიმპიადაზე ფორნიემ საოცრად ითამაშა და გუნდის ნამდვილი ლიდერი იყო რუდი გობერთან ერთად. 29 წლის ფრანგი 2019 წლის მსოფლიო ჩემპიონატის საუკეთესო ხუთეულში მოხვდა. რამდენიმე გამორჩეული თამაშისა და საერთაშორისო დონეზე გამოკვეთილი ძლიერი ნაკრებით, საფრანგეთი ევრობასკეტის გამარჯვების ერთ-ერთი ფავორიტია.9)ბოიან ბოგდანოვიჩი (ხორვატია) ბოგდანოვიჩისთვის , ისევე როგორც ალბათ ყველა მოთამაშისთვის ეროვნული ნაკრების სახელით თამაში განსაკუთრებული მნიშვნელობისაა და მისმა თავდადებულმა თამაშმა ოლიმპიადის საკვალიფიკაციო ეტაპზეც აღაფრთოვანა ხორვატი გულშემატკივარი. მან 38 ქულა ჩააგდო ნახევარფინალურ თამაშში გერმანიის წინააღმდეგ, თუმცა გამარჯვებისთვის ეს საკმარისი არ აღმოჩნდა. ბოგდანოვიჩის ბოლო ინტერვიუს მიხედვით, მათი მთავარი სურვილი ამ ეტაპზე მსოფლიოს ჩემპიონატის ბოლო რაუნდებში წარმატებული ასპარეზობაა და შემდგომში ევრობასკეტზე გადართვა. 8)დომანტას საბონისი (ლიეტუვა)საბონისი NBA-ში ერთ-ერთ გამორჩეულ მაღალ მეპასედ ჩამოყალიბდა და Indiana Pacers-ში რამდენიმე წლის გატარების შემდეგ ბევრ გულშემატკივარს შეაყვარა თავი. 26 წლის ცენტრი ლიეტუვის 2015 წლის ნაკრების წარმატების ერთ-ერთი შემოქმედი იყო და ეროვნულ ნაკრებში 2020 წელს ტოკიოს ოლიმპიადის საკვალიფიკაციო ეტაპის დროს დაბრუნდა.7)რუდი გობერი (საფრანგეთი)ბოლო წლებში რუდი გობერი საფრანგეთის ნაკრების ლიდერად ჩამოყალიბდა ზემოთხსენებულ ივან ფორნიესთან ერთად და მათ არაერთი სანაკრებო ტიტული მოიპოვეს, მათ შორის ტოკიოს 2020 წლის ოლიმპიადაზე - ვერცხლის მედალი, ხოლო 2015 წლის ევრობასკეტზე ბრინჯაოს მედალი. ზაფხულისთვის ნაკრებთან ერთად მზადყოფნა მან NBA-ის სეზონის დასრულებისთანავე დაადასტურა, რის შემდეგაც საფრანგეთის შანსები კიდევ უფრო გაიზარდა და სამართლიანად ითვლება ეს გუნდი ევრობასკეტის მოგების კანდიდატად. 6)ჯოელ ემბიდი (საფრანგეთი)ჯოელ ემბიდის ეს ფოტო ფოტოშოპითაა გაკეთებული, რადგან სულ რაღაც 2 დღის წინ დადასტურდა ოფიციალურად, რომ ის საფრანგეთის ნაკრებს შეუერთდება და კამერუნის სახელით არ იასპარეზებს. ეს სიახლე ნამდვილად სასიამოვნოა ევროპელი გულშემატკივრისთვის, რადგან კონტინენტის მთავარ საკალათბურთო ბრძოლაში NBA-ის ერთ-ერთი გამორჩეული ცენტრიც ჩაერთვება. ემბიდის სავარაუდო დებიუტს აგვისტოს ბოლოს ფიბას მსოფლიოს ჩემპიონატის მე-2 რაუნდში ელოდებიან.5)ლუკა დონჩიჩი (სლოვენია)გამორჩეული ევროპელი და NBA-ის ერთ-ერთი ვარსკვლავი ლუკა დონჩიჩი სლოვენიის ნაკრებს მუდმივად ეხმარება და ასე მოხდა წელსაც, როცა ლიგაში სეზონის დასრულებისთანავე ის სამშობლოში გაემგზავრა და დასვენებას მისი ქვეყნის სახელით ასპარეზობა არჩია. დონჩიჩმა 3 ივლისს გადამწყვეტი ბრძოლა მოაგებინა სლოვენიას შვედეთის წინააღმდეგ და ფიბას მსოფლიოს ჩემპიონატზე მოსახვედრად მნიშვნელოვანი გამარჯვებაც მოიპოვა 31-ქულიანი ორმაგი დუბლით. ფიბას გამოკითხვით ის ევროპის მიმდინარე საკვალიფიკაციო ეტაპის საუკეთესო მოთამაშედ დასახელდა. დონჩიჩი დაეხმარება სლოვენიას ევრობასკეტ 2022-ზეც, სადაც ასევე ერთ-ერთი ფავორიტები არიან. 4)იანის ანტეტოკოუნმპო (საბერძნეთი)იანის ანტეტოკოუნმპო დღეისათვის ევროპული პასპორტის მქონე საუკეთესო მოთამაშეა ლუკა დონჩიჩთან ერთად და მის დაბრუნებას ეროვნულ ნაკრებში უდიდესი ინტერესით ელიან არამხოლოდ ბერძენი გულშემატკივრები, არამედ მთელი საკალათბურთო სამყარო. ბოლოს იანისმა ნაკრებში 2019 წლის მსოფლიოს ჩემპიონატზე ითამაშა და 3 წლის შემდეგ ის აპირებს გუნდს ევრობასკეტ 2022-ის მოსაგებად ულიდეროს და პაპაგანისთან და ევროპის გამორჩეულ ბერძენ მოთამაშეებთან ერთად თავისი ქვეყნის წარმატებისთვის იბრძოლოს.3)ნიკოლა იოკიჩი (სერბეთი)ზედიზედ 2-გზის MVP და ბოლო წლებში ერთ-ერთი გამორჩეული სუპერ-ვარსკვლავი ნიკოლა იოკიჩი ოფიციალურად დადასტურებულია, რომ ევრობასკეტ 2022-ზე ითამაშებს და სერბეთის ღირსებას დაიცავს ფიბას მსოფლიოს ჩემპიონატის მეორე რაუნდოს თამაშებშიც აგვისტოს ბოლოს. სერბეთი ევროპის ერთ-ერთი ძლიერი ნაკრებია და ცხადია NBA-ის მოქმედი MVP ძალებს არ დაზოგავს თავისი ქვეყნისთვის კონტინენტის პირველობის მოსაპოვებლად.2)გოგა ბითაძე (საქართველო)ქართველი გულშემატკივარი ევრობასკეტ 2022-ს განსაკუთრებული ინტერესით ელოდება, რადგან ჩვენი ქვეყნის ისტორიაში მსგავსი მასშტაბის სპორტულ ჩემპიონატს პირველად ვმასპინძლობთ. გარდა სახლში თამაშის უპირატესობისა, უდიდესი მოლოდინია გოგა ბითაძის გამო, რადგან მან ივლისის სანაკრებო შეხვედრებში მონაწილეობა ვერ მიიღო. ქართველ ცენტრს განსაკუთრებული მოტივაცია ჰქონდა და აქვს ეროვნულ ნაკრებში თამაშის დროს, რასაც წლების განმავლობაში (ასაკობრივი ნაკრებიდან დაწყებული დღემდე) მისი გამორჩეული სტატისტიკები თუ უბრალოდ დამოკიდებულება ადასტურებს. თბილისში რამდენიმე კვირის წინ გამართულ შეხვედრაშიც მთელი თამაშის განმავლობაში ფეხზე იდგა ტრავმიანი ფეხით და გუნდს მორალურად ამხნევებდა. გოგა უდიდესი ძალა იქნება ჩვენი ნაკრებისთვის მის პოზიციაზე მოთამაშე გიორგი შერმადინთან ერთად და იმედი გვაქვს , მისი დაბრუნება წარმატებული აღმოჩნდება ჩვენი ქვეყნისთვის როგორც მსოფლიოს ჩემპიონატის საკვალიფიკაციო ეტაპის მე-2 რაუნდში (24 და 27 აგვისტოს), აგრეთვე ევრობასკეტ 2022-ზე 1 სექტემბრიდან.1)სანდრო მამუკელაშვილი (საქართველო)ეს ფოტო ფიბას 20-წლამდელთა ევროპის ჩემპიონატზეა გადაღებული 2018 წელს, როცა სანდრო მამუკელაშვილი ჩვენი ქვეყნის ახალგაზრდული ნაკრების ღირსებას იცავდა. მოგეხსენებათ, სანდრო ამერიკაში ცხოვრობს წლებია და კოლეჯში თუ შემდგომში NBA-ში თამაშის გამო ვერ ახერხებდა ეროვნულ ნაკრებს დახმარებოდა. სანდროს დებიუტს ბევრი ქართველი ივლისში ელოდა, რადგან მან დასვენების დღეები მშობლიურ გარემოში გაატარა, თუმცა აღმოჩნდა, რომ მისი კონტრაქტის გათვალისწინებით ვალდებული იყო ამერიკაში ჩასულიყო და ზედიზედ მე-2 წელი Milwaukee Bucks-ის საზაფხულო ლიგის გუნდში ეასპარეზა. საზაფხულო ლიგა ჯერ კიდევ მიმდინარეობს, სადაც 2 თამაშში საუკეთესო შედეგი სწორედ ქართველ ფორვარდს ჰქონდა და ზაფხულის სანაკრებო მატჩებს შესანიშნავ ფორმაში ხვდება. სანდროს დებიუტს (NBA-ში მოხვედრის შემდეგ) ნაკრებში 24 აგვისტოსს ველოდებით ნიდერლანდების წინააღმდეგ ახალ "თბილისი არენაზე", ხოლო 1 სექტემბრიდან ის ჩვენი ქვეყნის ღირსებას ევრობასკეტ 2022-ზე დაიცავს. 

1657535830

 მილოშ გლიგორიევიჩის გაწვრთნილმა საქართველოს ნაკრებმა ნიდერლანდები დაამარცხა.თურქეთში გამართულ საერთაშორისო ტურნირზე, მატჩი ჩვენი სრული უპირატესობით წარიმართა და 90:71 დასრულდა.საქართველოს ნაკრებში, 23 ქულით საუკეთესო მოთამაშე ნიკოლოზ გაფრინდაშვილი გახდა, ყველა კომპონენტში გამორჩეული კი ვლადიმერ სარალიძე – 20 ქულა, 11 მოხსნა, 3 პასი და 2 დაფარება. 8 ქულა ზურაბ ვაშაკიძემ მოაგროვა, 7-7 ვახტანგ გოგბერაშვილმა და გიორგი ჟღენტმა. სამმა კალათბურთელმა – მათე კაპანაძემ, ვლადიმერ თავაქარაშვილმა და ნიკა რატიანმა 5-5 ქულა მიითვალეს.შეგახსენებთ, რომ საქართველოს ნაკრები თბილისში გასამართი 20-წლამდელთა B დივიზიონისთვის ემზადება, რომელშიც 19 ქვეყნის ნაკრები მიიღებს მონაწილეობას. ტურნირი 15 ივლისიდან 24 ივლისის ჩათვლით ახალაშენებულ “თბილისი არენაზე” და ოლიმპიურ სასახლეში გაიმართება.

1657535207

როგორც იცით, 4 ივლისს გამართულ მსოფლიო ჩემპიონატის შესარჩევ შეხვედრაში, საქართველოს ეროვნულმა საკალათბურთო ნაკრებმა, ესპანეთის ნაკრები დაამარცხა და შემდეგ ეტაპზე გადაინაცვლა. მე-2 რაუნდი 24 აგვისტოს დაიწყება და პირველ მატჩს თბილისში ნიდერლანდების წინააღმდეგ გავმართავთ, მე-2 თამაშში კი 27 აგვისტოს იტალიას სტუმრად დავუპირისპირდებით. ესპანეთის ეროვნული ნაკრები მსოფლიოს მოქმედი ჩემპიონია. მათ, 2019 წელს, არგენტინის ეროვნული ნაკრები 95-75 დაამარცხეს და გუნდის ისტორიაში მეორე მსოფლიო ჩემპიონატი მოიგეს.  დანაკლისის მიუხედავად, ესპანეთის ნაკრები მაინც ძლიერი შემადგენლობით იყო წარმოდგენილი თბილისის ახალ სპორტის სასახლეში. ესპანეთის რიგებში, საუკეთესო მატჩი ჰქონდა Xabier Lopez-Arostegui-ს, რომელიც ვალენსიას ფორვადია. მან 14 ქულა, 6 მოხსნა და 3 პასი მოაგროვა. ასევე, კარგი თამაში ჰქონდა Dario Brizuela-საც, Unicaja-ს გამთამაშებელს: 12 ქულა, 1 მოხსნა და 1 პასი. საქართველოსთვის ეს უმნიშვნელოვანესი მოვლენაა, რადგან ასეთი რთული მეტოქის, ასეთ გადამწყვეტ მატჩში დამარცხება იოლი არაა. ამ გამარჯვებით, ისტორიაში პირველ მსოფლიო ჩემპიონატამდე უდიდესი ნაბიჯი გადავდგით.      

1656976986

ფიბას მსოფლიოს ჩემპიონატის შესარჩევი ეტაპის მორიგ თამაშს დღეს ახლადგახსნილმა თბილისი არენამ უმასპინძლა. ჩვენი ნაკრები ევროპის გამორჩეულ გუნდს - ესპანეთს დაუპირისპირდა და მატჩი ჩვენი გამარჯვებით დასრულდა.თამაშის პირველი 2 მეოთხედი მეტნაკლებად საქართველოს ნაკრების უპირატესობით მიმდინარეობდა, თუმცა ესპანელები მარტივად დანებებას არ აპირებდნენ და 4 მეოთხედის შემდეგ ტაბლოზე თანაბარი ქულები დაფიქსირდა. ოვერტაიმში ბრძოლა თავიდან დაიწყო და განსაკუთრებით აღსანიშნავია, რომ ასეთ დროს ყოველთვის დიდი როლი აქვს გულშემატკივარს, რომელიც დარბაზიდან ამხნევებს მის საყვარელ გუნდს. ასე მოხდა ჩვენს შემთხვევაშიც : დარბაზი მეტად ახმაურდა, ემოციებმა იმატა, ქულა-ქულაში ბრძოლა გაგრძელდა, თუმცა გარდამტეხი აღმოჩნდა ახალგაზრდა გამთამაშებლის - რატი ანდრონიკაშვილის ზედიზედ 2 ჩაჭრა და მოპოვებული ქულები, რამაც საქართველოს ნაკრები წინ გაიყვანა. აქვე უნდა აღინიშნოს ბექა ბექაურის დიდებული თამაში ბოლო წუთებში, როცა მან ზედიზედ 2-ჯერ დააფარა ესპანელ მეტოქეს. საბოლოო ანგარიშით 82-76 საქართველოს ნაკრებმა G-ჯგუფში ისევ პირველ ადგილზე გადაინაცვლა, თუმცა ერთით ნაკლები თამაშები აქვთ ჩატარებული ესპანეთსა და უკრაინას. მეორე რაუნდის მეტოქეების ბედი და ჩატარების ადგილები 7 ივლისს უკრაინა-ესპანეთის დასრულების შემდეგ გადაწყდება. მომდევნო ეტაპი 24 აგვისტოს დაიწყება და 27 აგვისტომდე გაგრძელდება, შემდეგ კი ჩვენი ნაკრები სრულ კონცენტრაციას ევრობასკეტ 2022-ზე მოახდენს. 

1656176037

საქართველოს ეროვნული საკალათბურთო ნაკრები მსოფლიოს ჩემპიონატის შესარჩევი ეტაპისა და წლის მთავარი სპორტული ღონისძიების - ევრობასკეტ 2022-სთვის მზადებას იწყებს. ილიას ზუროსმა 24 ივნისს გამართულ პრესკონფერენციაზე მოსამზადებელ ეტაპზე ისაუბრა და ფედერაციის წარმომადგენლებმა ჟურნალისტებს დეტალური გეგმაც წარუდგინეს. 17 ივნისიდან ეროვნული ნაკრების გაფართოებული შემადგენლობა მსოფლიოს ჩემპიონატის მომდევნო ეტაპის მატჩებისთვის ემზადება და პირველი თამაში უკრაინის წინააღმდეგ ლატვიაში 1 ივლისს გაიმართება ; 4 ივლისს ახალ სპორტის სასახლეში ჩვენი ნაკრები ესპანეთს დაუპირისპირდება და ყველას მოგიწოდებთ ერთად ვუგულშემატკივროთ ჩვენს გუნდს ახალ არენაზე ! ; 21 ივლისიდან ნაკრები თბილისში განაახლებს ვარჯიშებს და იწყება მზადება ევრობასკეტისთვის : 2 სპარინგ-მატჩი უნგრეთთან (უნგრეთში) 5 და 6 აგვისტოს. 2 სპარინგ-მატჩი ისრაელთან (თბილისში) 11 და 13 აგვისტოს ; 17-დან 19 აგვისტომდე აკროპოლისის თასი ათენში, სადაც თურქეთთან, საბერძნეთთან და პოლონეთთან ერთად ვასპარეზობთ ; 24 და 27 აგვისტოს მსოფლიოს ჩემპიონატის მეორე ეტაპის მატჩები გაიმართება (მეტოქე და ჩატარების ადგილი პირველი ეტაპის დასრულების შემდეგ გახდება ცნობილი) ; 1 სექტემბრიდან კი ჩვენი ქვეყანა ევროპის მთავარი საკალათბურთო ჩემპიონატის მასპინძელი ხდება და 5 მატჩი 7 სექტემბრის ჩათვლით გაიმართება. ჯგუფიდან გასვლის შემთხვევაში 8 სექტემბრიდან ნაკრები ბერლინში ფინალურ ეტაპზე გაემგზავრება. როგორც ხედავთ ქართველ კალათბურთელებს მართლაც ინტენსიური და დატვირთული მოსამზადებელი ეტაპი აქვთ, რაც იმედი გვაქვს შედეგს გამოიღებს და ღირსეულად ვიასპარეზებთ როგორც მსოფლიო ჩემპიონატის მომდევნო მატჩებზე,აგრეთვე ევრობასკეტ 2022-ზე,სადაც ჯგუფის მასპინძლები ვართ.