ღამის მიმოხილვა: ენტონი დევისის 44 ქულა, კარი მე-16 ადგილზე, უორიორსის რვა მოგება ზედიზედ

NBA-ში ღამით რვა მატჩი გაიმართა. სანდრო მამუკელაშვილის ლეიკერსის, ვიქტორ ვემბანიამას სპერსისა და კუპერ ფლეგის მავერიკსის მატჩებზე ცალკე სტატიებში მოგიყვებით, აქ კი დანარჩენ ხუთ შეხვედრას მიმოვიხილავთ.

ენტონი დევისი ვაშინგტონ უიზარდსი · 2026-27 სეზონი 25.7 ქულა 9.7 მოხსნა 2.0 პასი პროფილი ›

პისტონსი 122:111 უიზარდსი: დევისის 44 ქულა საკმარისი არ აღმოჩნდა

ენტონი დევისის მონაწილეობა მატჩამდე კოჭის პრობლემის გამო საეჭვო იყო, თუმცა დეტროიტში მან 44 ქულა ჩააგდო და 13 ბურთი მოხსნა (ტყორცნა 16/21, საჯარიმო 10/11). პირველ ნახევარში დევისს უკვე 30 ქულა ჰქონდა, თუმცა პარტნიორებისგან დიდი დახმარება არ მიუღია.

პისტონსში ჯონ კოლინზმა 24 ქულა ჩააგდო და 10 ბურთი მოხსნა. ძირითად ხუთეულში გადაყვანილ დენის ჯენკინსს 22 ქულა და 8 შედეგიანი გადაცემა აქვს, დანკან რობინსონს 22 ქულა. უიზარდსში ეი-ჯეი დიბანცამ 21 ქულა ჩააგდო, ტრეი იანგს 20 ქულა და 7 შედეგიანი გადაცემა აქვს. უიზარდსმა ზედიზედ მეოთხე მატჩი წააგო, პისტონსის შედეგი კი 7-3-ია.

უორიორსი 138:87 პელიკანსი: კარიმ დეროზანს გადაასწრო

უორიორსმა ზედიზედ მერვე მატჩი მოიგო და პელიკანსი 51 ქულის სხვაობით დაამარცხა. სტეფენ კარიმ მოედანზე მხოლოდ 21 წუთი გაატარა და 25 ქულა ჩააგდო (საჯარიმო 9/9). ამ ქულებით მან NBA-ის ისტორიის ბომბარდირთა სიაში დემარ დეროზანს (26 800) გადაასწრო და მე-16 ადგილი დაიკავა. ახლა მას 26 803 ქულა აქვს.

ბრენდინ პოჯემსკიმ 25 ქულა ჩააგდო, იაქსელ ლენდებორგს 23 ქულა აქვს (ტყორცნა 8/10, სამქულიანი 4/4). უორიორსმა მატჩში 37 შედეგიანი გადაცემა დააგროვა. პელიკანსი ზაიონ უილიამსონისა და ტრეი მერფის გარეშე თამაშობდა. უორიორსის შედეგი 8-3-ია.

როკეტსი 110:100 ნაგეტსი: მარეის 38 ქულა არ ეყო

როკეტსში კევინ დურანტმა 23 ქულა ჩააგდო, 12 ბურთი მოხსნა და 8 შედეგიანი გადაცემა შეასრულა. ალპერენ შენგიუნს 20 ქულა და 11 მოხსნა აქვს. ორი წაგების შემდეგ როკეტსმა კვლავ მოიგო.

ნაგეტსში ჯამალ მარეიმ 38 ქულა ჩააგდო (ტყორცნა 14/23), ნიკოლა იოკიჩს 25 ქულა და 16 მოხსნა აქვს. მესამე მეოთხედში ნაგეტსმა 18:2 სერიით ანგარიში 60:60 გაათანაბრა, თუმცა მეოთხე მეოთხედში როკეტსი უფრო ძლიერი იყო.

გრიზლისი 118:102 რეპტორსი: გასვლით 5-0

ტაი ჯერომმა 27 ქულა ჩააგდო, კამერონ ბუზერს 22 ქულა, 7 მოხსნა და 8 შედეგიანი გადაცემა აქვს. გრიზლისმა გასვლით ხუთივე მატჩი მოიგო. ასეთივე შედეგი გასვლით მხოლოდ სპერსს აქვს. რეპტორსი კავაი ლეონარდის, სკოტი ბარნსისა და იმანუელ ქვიქლის გარეშე თამაშობდა.

ჰორნეტსი 124:112 კავალიერსი: ექვსი წაგების შემდეგ

ჰორნეტსმა ზედიზედ ექვსი წაგების შემდეგ პირველად მოიგო. გრეისონ ალენმა 27 ქულა ჩააგდო (6 სამქულიანი), ნაზ რიდს 25 ქულა და 13 მოხსნა აქვს. ჰორნეტსმა 46 სამქულიანიდან 23 ჩააგდო, მესამე მეოთხედში კი უპირატესობა 33 ქულამდე გაზარდა. შარლოტის გუნდი სამი ძირითადი მოთამაშის გარეშე თამაშობდა.