კეიდ კანინგემის კარიერის რეკორდი, 52 ქულა: პისტონსმა უიზარდსი ორი დამატებითი დროის შემდეგ დაამარცხა

პისტონსმა დღეს დილით ვაშინგტონში უიზარდსი ორი დამატებითი დროის შემდეგ 144:140 დაამარცხა. მატჩის გმირი კეიდ კანინგემი იყო: 52 ქულა, 11 შედეგიანი გადაცემა და 5 მოხსნა. ეს მისი კარიერის რეკორდია. აქამდე მისი საუკეთესო შედეგი 46 ქულა იყო, რომელიც დაახლოებით ერთი წლის წინ, ისევ უიზარდსის წინააღმდეგ დააგროვა.

კეიდ კანინგემი დეტროიტ პისტონსი · 2026-27 სეზონი 25.0 ქულა 5.2 მოხსნა 7.9 პასი პროფილი ›

კანინგემმა 25 ტყორცნიდან 16 ჩააგდო, საჯარიმოდან კი 18-დან 17. მთელი მატჩის განმავლობაში მას ბურთი ერთხელაც არ დაუკარგავს. NBA-ში დაკარგულ ბურთებს 1977-78 წლების სეზონიდან აღრიცხავენ და მას შემდეგ კანინგემი პირველი მოთამაშეა, რომელსაც ერთ მატჩში 50 ქულა და 10 შედეგიანი გადაცემა აქვს დაკარგული ბურთის გარეშე.

ორი დამატებითი დრო

სამი მეოთხედის შემდეგ კანინგემს მხოლოდ 22 ქულა ჰქონდა. მეოთხე მეოთხედში მან 18 ქულა ჩააგდო, თუმცა ძირითადი დროის ბოლო წამზე ტრეი იანგმა სამქულიანი ჩააგდო და ანგარიში 121:121 გაათანაბრა.

პირველი დამატებითი დროის პირველი 7 ქულა უიზარდსმა ჩააგდო. ანგარიში 128:121 გახდა. კანინგემმა ჯერ ორქულიანი, შემდეგ ორი საჯარიმო, ბოლოს კი სამქულიანი ჩააგდო: 130:130. დანკან რობინსონმა პისტონსი კვლავ დააწინაურა, მაგრამ დრაფტის პირველმა ნომერმა ეი-ჯეი დიბანცამ ანგარიში ისევ გაათანაბრა, როცა დასრულებამდე წამზე ნაკლები რჩებოდა.

მეორე დამატებით დროში კანინგემმა სამქულიანი ჩააგდო და პისტონსი 135:132 დააწინაურა. ამის შემდეგ ენტონი დევისი მეექვსე ფოლის გამო მოედნიდან გავიდა. მატჩის დასრულებამდე 25 წამით ადრე კანინგემმა ორქულიანი ჩააგდო და ანგარიში 142:138 გახდა. მეოთხე მეოთხედსა და ორ დამატებით დროში მან ჯამში 30 ქულა დააგროვა.

პისტონსის ისტორიაში ერთ მატჩში მეტი ქულა მხოლოდ სამ მოთამაშეს აქვს: ჯერი სტეკჰაუსს (57), კელი ტრიპუკას (56) და დეივ ბინგს (54).

ტომპსონის პირველი ტრიპლ-დაბლი

ოსარ ტომპსონმა კარიერაში პირველი ტრიპლ-დაბლი შეასრულა: 17 ქულა, 11 მოხსნა და 11 შედეგიანი გადაცემა. დენის ჯენკინსმა 21 ქულა ჩააგდო.

უიზარდსში სამმა მოთამაშემ 30 და მეტი ქულა ჩააგდო: ტრეი იანგმა 37 (23 ტყორცნიდან 8 ზუსტი), ენტონი დევისმა და ალექს სარმა კი 30-30 (სარმა 14 ტყორცნიდან 12 ზუსტი). იანგმა ასევე 14 შედეგიანი გადაცემა შეასრულა, დევისმა კი 15 მოხსნა დააგროვა. კლუბში ასეთი რამ ბოლოს 1969 წლის 18 ნოემბერს მოხდა, როცა გუნდს ჯერ კიდევ „ბალტიმორ ბულეტსი“ ერქვა.

უიზარდსმა ზედიზედ მეექვსე მატჩი წააგო. მისი მაჩვენებელი 4-9-ია. პისტონსის მაჩვენებელი 8-3-ია. პისტონსი შემდეგ მატჩს კვირას, 15 ნოემბერს, თბილისის დროით 05:00-ზე მაიამიში ჰიტთან ითამაშებს. უიზარდსი ორშაბათს, 16 ნოემბერს, 04:00-ზე რაკეტსს უმასპინძლებს.