კლეი ტომპსონის გადამწყვეტი სამქულიანი, შეის 42 ქულა, ნიქსის 84 ქულა ნახევარში: ღამის მიმოხილვა

NBA-ში ღამით 14 მატჩი გაიმართა. ლეიკერსის, სპერსისა და სიქსერსის მატჩებზე ცალკე სტატიებში მოგიყევით.

დონოვან მიტჩელი კლივლენდ კავალიერსი · 2026-27 სეზონი 22.5 ქულა 5.0 მოხსნა 5.5 პასი პროფილი ›

ჰიტი 117:116 კლიპერსი (დამატებითი დრო)

მატჩის დასრულებამდე 1 წამით ადრე კლეი ტომპსონმა მარცხენა კუთხიდან გადამწყვეტი სამქულიანი ჩააგდო. ბურთი მას ხაზიდან იანის ანტეტოკუნმპომ გადასცა. ტომპსონმა 30 ქულა ჩააგდო (8/17 სამქულიანი). ბემ ადებაიომ სეზონის საუკეთესო 35 ქულა და 10 მოხსნა დააგროვა, ანტეტოკუნმპომ კი 27 ქულა და 14 მოხსნა.

ჰიტი მეორე მეოთხედის ბოლოს 20 ქულით ჩამორჩებოდა, ახლა კი 3-5-ზეა. კლიპერსმა ზედიზედ მეშვიდე მატჩი წააგო. გუნდი 1-7-ზეა. კლიპერსში დარიუს გარლენდმა 26 ქულა ჩააგდო. ჰიტი ხვალ, 6 ნოემბერს, თბილისის დროით 07:00-ზე გასვლით უორიორსს შეხვდება.

თანდერი 124:116 კავალიერსი

შეი გილჯეს-ალექსანდერმა 42 ქულა და 8 შედეგიანი გადაცემა დააგროვა (5/11 სამქულიანი, 15/19 საჯარიმო). სამ დღეში კავალიერსთან ორ მატჩში მას უკვე 85 ქულა აქვს. აჯეი მიტჩელმა 23 ქულა ჩააგდო, ახალბედა ბენეტ სტირცმა კი 16 (4/7 სამქულიანი).

თანდერი 25 ქულით იგებდა, თუმცა ბოლო წუთებში დონოვან მიტჩელმა ზედიზედ სამი სამქულიანი ჩააგდო და ანგარიში 117:111 გახადა. მიტჩელმა მატჩი 27 ქულით დაასრულა. თანდერი 6-2-ზეა, კავალიერსი 4-4-ზე.

ნიქსი 135:105 ბულსი

ჯალენ ბრანსონმა პირველ მეოთხედში 22 ქულა ჩააგდო (8/10 ტყორცნა, 4/5 სამქულიანი), მატჩში კი 33. ნიქსმა მეოთხედი 43:21 მოიგო, პირველი ნახევარი კი 84:52. ამით ნიქსმა ერთ ნახევარში ჩაგდებული ქულების კლუბის რეკორდი გაიმეორა (1988 წელი). პირველად მოხდა, რომ ნიქსმა მატჩის პირველი ორი მეოთხედიდან თითოეულში მინიმუმ 40 ქულა ჩააგდო.

ჩემპიონმა 0-3 სტარტის შემდეგ ხუთიდან ოთხი მატჩი მოიგო. ნიქსი ახლა 4-4-ზეა. ბულსმა ზედიზედ მეექვსე მატჩი წააგო.

სხვა მატჩები

• ბლეიზერსი 132:119 სანსი: ბლეიზერსი გასვლით 5-0-ზეა, საერთო შედეგით კი 6-1-ზე. გუნდი დასავლეთის ლიდერია. დემიენ ლილარდმა 25 ქულა ჩააგდო, დონოვან კლინგანმა 24 ქულა და 11 მოხსნა დააგროვა, დენი ავდიამ კი 21 ქულა და 12 შედეგიანი გადაცემა. სანსი, გოგა ბითაძის მეჯიქის მომდევნო მეტოქე, 1-5-ზეა.
• პელიკანსი 120:113 ჯაზი (დამატებითი დრო): პელიკანსმა 0-4 სტარტის შემდეგ ზედიზედ მეოთხე მატჩი მოიგო. ზაიონ უილიამსონმა 23 ქულა მეორე ნახევარსა და დამატებით დროში ჩააგდო. კეიონტე ჯორჯის 39 ქულა ჯაზს არ ეყო.
• ნაგეტსი 128:109 რეპტორსი: ნიკოლა იოკიჩმა 32 ქულა, 11 შედეგიანი გადაცემა და 10 მოხსნა დააგროვა. ეს სეზონში მისი მესამე ტრიპლ-დაბლია. მესამე მეოთხედი ნაგეტსმა 41:15 მოიგო.
• ტიმბერვულვზი 117:107 როკეტსი: აიო დოსუნმუმ 21 ქულა ჩააგდო. ალპერენ შენგიუნის ტრიპლ-დაბლი (17 ქულა, 12 მოხსნა, 10 შედეგიანი გადაცემა) როკეტსს არ ეყო.
• პეისერსი 107:103 გრიზლისი: პეისერსმა ხუთი მარცხის შემდეგ მოიგო. აარონ ნესმითმა გადამწყვეტი სამქულიანი ბოლო წამებში ჩააგდო. გრიზლისმა ზედიზედ მეორე მატჩი წააგო.