NBA-ს ახალი სეზონი 20 ოქტომბერს იწყება: სრული გზამკვლევი 2026-27 სეზონისთვის

NBA-ს რეგულარული სეზონი სამშაბათს, 20 ოქტომბერს, ამერიკული დროით იწყება და 2027 წლის 11 აპრილამდე გაგრძელდება. პირველ საღამოს სამი მატჩი გაიმართება, სამივეს NBC და Peacock აჩვენებს.

გახსნის საღამო თბილისის დროით

• ბოსტონი – დეტროიტი - 20 ოქტომბერი, 23:00. გასული სეზონის აღმოსავლეთის ორი საუკეთესო გუნდი ერთმანეთს ხვდება.
• ფილადელფია – ნიუ იორკი - 21 ოქტომბერი, 03:00. მატჩამდე ნიქსი ჩემპიონის დროშას აღმართავს, ლებრონ ჯეიმსი კი სიქსერსის ფორმით პირველად გამოვა.
• ოკლაჰომა სიტი – სან ანტონიო - 21 ოქტომბერი, 05:30. 2026 წლის დასავლეთის ფინალის რევანში.

ქართველი გულშემატკივრისთვის მთავარი თარიღი 21 ოქტომბერია (საქართველოში 22-ის დილა): სანდრო მამუკელაშვილის ლოს ანჯელეს ლეიკერსი სეზონს საშინაო მატჩით გოლდენ სტეიტ უორიორსის წინააღმდეგ იწყებს.

ვინ არიან ფავორიტები

ბუკმეკერები ტიტულის მთავარ პრეტენდენტებად სან ანტონიოსა და ოკლაჰომა სიტის თანაბრად ასახელებენ. მათ მოსდევენ ფილადელფია და მოქმედი ჩემპიონი ნიუ იორკი, შემდეგ კი ბოსტონი. სპერსმა გასულ სეზონში დასავლეთის ფინალი მეშვიდე მატჩში მოიგო, თანდერმა კი რეგულარული ჩემპიონატი 64-18 შედეგით დაასრულა. MVP-ის ტიტულის ფავორიტად ვიქტორ ვემბანიამა მიიჩნევა - გუნდების მენეჯერების ყოველწლიურ გამოკითხვაში მას ხმების 77% მიეცა.

სეზონის მთავარი თემები

• შეძლებს თუ არა ნიქსი ტიტულის დაცვას? ზედიზედ ორჯერ ჩემპიონი ბოლოს გოლდენ სტეიტი გახდა 2017 და 2018 წლებში.
• ახალი ფილადელფია: ლებრონ ჯეიმსი, ჯეილენ ბრაუნი, ჯოელ ემბიიდი და ტაირიზ მაქსი ერთ გუნდში.
• იანის ანტეტოკუნმპო მაიამიში - ბერძენი სუპერვარსკვლავის პირველი სეზონი მილუოკის გარეთ.
• სპერსი და თანდერი - დასავლეთის ახალი დიდი მეტოქეობა.

სეზონის მნიშვნელოვანი თარიღები

• NBA Cup - ჯგუფური ეტაპი 30 ოქტომბრიდან 27 ნოემბრამდე, ფინალი 11 დეკემბერს ინდიანაპოლისში.
• შობის დღე - 5 მატჩი.
• სავაჭრო დედლაინი - 11 თებერვალი.
• ვარსკვლავების მატჩი - 19-21 თებერვალი, ფინიქსი.
• რეგულარული სეზონის ბოლო დღე - 11 აპრილი.

სეზონიდან ძალაში შედის დრაფტის ლატარიის ახალი სისტემაც, რომლის მიზანი გუნდების მიერ განზრახ წაგებების შემცირებაა. დეტალურად ამის შესახებ ცალკე სტატიაში მოგიყვებით.

ტურნირის ცხრილს, ლიდერებს და ყველა მატჩის შედეგს NBA.ge-ზე ყოველდღე, ქართულად განვაახლებთ.