ღამის მიმოხილვა: ნეტსის პირველი გამარჯვება სეზონში, სელტიქსის ხუთი მოგება ზედიზედ

კვირას NBA-ში ოთხი მატჩი გაიმართა. ლეიკერსის, უორიორსისა და მეჯიქის მატჩებს ცალკე სტატიებში მიმოვიხილავთ, აქ კი ღამის სხვა მთავარი ამბებია.

მაიკლ პორტერ-უმცროსი ბრუკლინ ნეტსი · 2026-27 სეზონი 21.2 ქულა 7.3 მოხსნა 1.3 პასი პროფილი ›

ნეტსი 98:90 პეისერსი. ხუთი მარცხის შემდეგ ნეტსმა სეზონში პირველი გამარჯვება მოიპოვა. მაიკლ პორტერ-უმცროსმა 23 ქულა და 9 მოხსნა დააგროვა, ჯულიუს რენდლმა 20 ქულა და 6 შედეგიანი გადაცემა, დეირონ შარპმა კი 15 ქულა და 13 მოხსნა. ახალბედა ნოლან ტრაორემ 16 ქულა ჩააგდო და 6 შედეგიანი გადაცემა შეასრულა, შეცვლაზე გამოსულმა მორიც ვაგნერმა კი 14 ქულა დაამატა.

ნეტსი შესვენებაზე მხოლოდ 43:40 იგებდა, მესამე მეოთხედში კი მან უპირატესობა სამჯერ 12 ქულამდე გაზარდა. მეოთხე მეოთხედის დასაწყისში პეისერსმა სხვაობა 75:72-მდე შეამცირა, თუმცა ანგარიში ვერ გაათანაბრა. მოხსნებში ნეტსმა პეისერსს 43:37 აჯობა. ახალბედა მაიკლ ბრაუნ-უმცროსმა ზურგის პრობლემის გამო დაისვენა.

პეისერსში ენდრიუ ნემბჰარდმა 23 ქულა ჩააგდო, პასკალ სიაკამმა კი 17. გუნდის შედეგი 2-5-ია. ივიცა ზუბაცმა და ობი ტოპინმა ტრავმების გამო არ ითამაშეს, ტაირიზ ჰალიბერტონი კი კიდევ მინიმუმ 10 დღე არ ითამაშებს.

მეჯიქი 97:108 სელტიქსი. პირველი მეოთხედის ბოლოს ჯეისონ ტეიტუმი მეტოქეს თავით შეეჯახა. სისხლდენის გამო მან მოედანი დატოვა. მეორე მეოთხედში ის მოედანზე დაბრუნდა. მატჩი მან 32 ქულით დაასრულა და 17 საჯარიმოდან 15 ჩააგდო. სელტიქსი ხვალ, 3 ნოემბერს, თბილისის დროით 05:30-ზე გასვლით როკეტსს შეხვდება. ეს დღის ერთ-ერთი საუკეთესო მატჩია: სელტიქსის შედეგია 5-1, როკეტსის კი 6-1.

კვირის შემდეგ ლიგაში ერთი დაუმარცხებელი გუნდია, გრიზლისი (6-0), გამარჯვების გარეშე კი მხოლოდ კინგსია (0-6). ხვალ ორივე გუნდი მოედანზე გავა, ნეტსი კი ნიქსს შეხვდება.