შეის 43 ქულა, კინგსის პირველი გამარჯვება, კანინგემის 33 ქულა: ღამის მიმოხილვა
შეი გილჯეს-ალექსანდერმა ბოლო წუთზე გადამწყვეტი სამქულიანი ჩააგდო, კინგსმა სეზონში პირველად მოიგო, კეიდ კანინგემმა კი 33 ქულა სამ მეოთხედში დააგროვა.
NBA-ში ღამით 15 მატჩი გაიმართა. ლიგის ყველა გუნდი მოედანზე გავიდა, კინგსმა კი სეზონის პირველი გამარჯვება მოიპოვა. ლეიკერსის, მეჯიქის და გრიზლისის მატჩებზე ცალკე სტატიებში მოგიყევით.
შეი გილჯეს-ალექსანდერი
ოკლაჰომა სიტი თანდერი · 2026-27 სეზონი
28.4 ქულა
4.3 მოხსნა
4.0 პასი
პროფილი ›
თანდერი 117:112 კავალიერსი
შეი გილჯეს-ალექსანდერმა კლივლენდში 43 ქულა ჩააგდო, რაც მისი სეზონის საუკეთესო შედეგია. მან 35 ტყორცნა შეასრულა (14 ზუსტი), 11/12 საჯარიმო ჩააგდო და 8 შედეგიანი გადაცემა დაამატა. მატჩის დასრულებამდე 32.6 წამით ადრე მისმა სამქულიანმა თანდერი დააწინაურა.
აჯეი მიტჩელმა 20 ქულა ჩააგდო, აიზეია ჰარტენშტაინმა კი 14 მოხსნა დააგროვა. ეს კავალიერსის პირველი საშინაო მარცხია სეზონში. დონოვან მიტჩელმა 17 ქულა და 11 შედეგიანი გადაცემა დააგროვა. გუნდები ისევ შეხვდებიან 5 ნოემბერს, ოკლაჰომა-სიტიში.
კინგსი 115:100 მავერიკსი
კინგსმა დალასში სეზონის პირველი გამარჯვება მოიპოვა და შედეგი 1-6 გახადა. ახალბედა დარიუს აკუფ-უმცროსმა 25 ქულა ჩააგდო, მალიკ მონკმა 24, ზაკ ლავინმა კი 23. მავერიკსში კუპერ ფლეგმა 3/19 ტყორცნა შეასრულა და 17 ქულიდან 11 საჯარიმოებით დააგროვა. კაირი ირვინგმა ამ მატჩში არ ითამაშა.
კინგსის მომდევნო მეტოქე ლეიკერსია: 5 ნოემბერს, თბილისის დროით 07:00-ზე, სანდრო მამუკელაშვილის გუნდი საკრამენტოში ითამაშებს.
პისტონსი 124:91 ჰორნეტსი
კეიდ კანინგემმა სამ მეოთხედში 33 ქულა ჩააგდო (13/20 ტყორცნა), 7 შედეგიანი გადაცემა, 5 ჩაჭრა და 5 მოხსნა დააგროვა. მეოთხე მეოთხედში ის აღარ გამოსულა. დანკან რობინსონმა 24 ქულა ჩააგდო. პისტონსმა ზედიზედ მესამე მატჩი მოიგო და შედეგი 6-1 გახადა.
სხვა მატჩები
- ჰოუქსი 108:104 პეისერსი: პეისერსს მხოლოდ ექვსი მოთამაშე ჰყავდა, თუმცა მატჩი ბოლო წამებამდე საინტერესო იყო. ნიკილ ალექსანდერ-უოკერმა 34 ქულა ჩააგდო (9/15 სამქულიანი).
- რეპტორსი 125:118 კლიპერსი: ბოლო მეოთხედი რეპტორსმა 47:27 მოიგო. სკოტი ბარნსმა ამ მეოთხედში 15 ქულა ჩააგდო, მატჩში კი 22 ქულა და 15 მოხსნა დააგროვა. კლიპერსმა ზედიზედ მეექვსე მატჩი წააგო.
- ნიქსი 103:90 ნეტსი: ნიქსმა ბოლო მეოთხედი 25:5 სერიით დაიწყო და ნეტსი ზედიზედ მე-15-ჯერ დაამარცხა.
