ღამის მიმოხილვა

ღამის მიმოხილვა: ვემბანიამას 32 ქულა და „შანკი“, გრიზლისის ზედიზედ მეხუთე გამარჯვება

ვიქტორ ვემბანიამამ კლიპერსთან 32 ქულა ჩააგდო და ახალი მოძრაობა, „შანკი“, აჩვენა. გრიზლისმა უორიორსი 126:98 დაამარცხა და ზედიზედ მეხუთე მატჩი მოიგო.

ღამის მიმოხილვა: ვემბანიამას 32 ქულა და „შანკი“, გრიზლისის ზედიზედ მეხუთე გამარჯვება

სან-ანტონიო სპერსი პისტონსთან მარცხის შემდეგ გამარჯვებას დაუბრუნდა: მან შინ კლიპერსი 124:112 დაამარცხა. ვიქტორ ვემბანიამამ 32 ქულა (13/26) და 11 მოხსნა დააგროვა. ამ სეზონში ეს მისი მეშვიდე მატჩია 30 ან მეტი ქულით.

ვიქტორ ვემბანიამა სან ანტონიო სპერსი · 2026-27 სეზონი 28.6 ქულა 11.9 მოხსნა 3.3 პასი პროფილი ›

სტეფონ კასლმა 21 ქულა და 12 შედეგიანი გადაცემა დააგროვა, ჯულიან შამპანმა კი 20 ქულა ჩააგდო. კლიპერსში დარიუს გარლენდმა და ბრუკ ლოპესმა 23-23 ქულა ჩააგდეს, მაქს სტრუსმა კი 18 (სამქულიანები 5/9). მატჩის დასრულებამდე 8 წუთით ადრე კასლის ჩაჭრისა და შამპანის სამქულიანის შემდეგ სპერსი 105:97 იგებდა. ლოპესმა და სტრუსმა ზედიზედ ორი სამქულიანით უპასუხეს, თუმცა სპერსმა უპირატესობა შეინარჩუნა.

ვიქტორ ვემბანიამას 32 ქულა და 11 მოხსნა კლიპერსთან (NBA, YouTube)

რა არის „შანკი“

მატჩის დასრულებამდე 3 წუთი და 34 წამი რჩებოდა, როცა ვემბანიამამ კასლისგან გრძელი გადაცემა მიიღო. ის კალათთან მარტო იყო, თუმცა დანკის ნაცვლად მან ბურთი ტყორცნის მსგავსი მოძრაობით ჩააგდო. ამ მოძრაობას სპერსის მატჩების კომენტატორი შონ ელიოტი ხუმრობით „შანკს“ (shot + dunk) უწოდებს.

მატჩის შემდეგ ვემბანიამამ თქვა, რომ მარჯვენა ხელის თითზე ბუშტი აქვს, რომელიც დანკების გამო გაუჩნდა და ყოველი დანკის დროს ძალიან სტკივა. მისი თქმით, დანკებს არ თმობს, თუმცა შეძლებისდაგვარად მათ ერიდება. ოფიციალურ სტატისტიკაში „შანკი“ მაინც დანკად ჩაითვალა. სეზონში ვემბანიამას უკვე 72 დანკი აქვს, ლიგაში ყველაზე მეტი. ამ ტემპით ის სეზონს 369 დანკით დაასრულებს, 1997-98 სეზონიდან რეკორდი კი რუდი გობერს ეკუთვნის (306, 2018-19).

ვემბანიამას „შანკი“ კლიპერსთან (NBA, YouTube)

სპერსის მაჩვენებელი 13-3-ია. გუნდი დილან ჰარპერის გარეშე თამაშობს, რომელიც მარცხენა თეძოს ტრავმის გამო 1-3 კვირით ვერ ითამაშებს.

გრიზლისმა უორიორსი 126:98 დაამარცხა

მემფის გრიზლისმა შინ გოლდენ სტეიტ უორიორსი 126:98 დაამარცხა და ზედიზედ მეხუთე გამარჯვება მოიპოვა. გრიზლისი მატჩში ერთხელაც არ ჩამორჩა, მეოთხე მეოთხედში კი 34 ქულით იგებდა. ჯეილენ უელსმა 22 ქულა ჩააგდო (8/10), სედრიკ კოუარდმა 19. კამერონ ბუზერმა 16 ქულა უშეცდომოდ დააგროვა (6/6), კემ სპენსერმა კი 11 შედეგიანი გადაცემა შეასრულა.

გრიზლისი ტაი ჯერომისა და ზაკ იდის გარეშე თამაშობდა, მეორე მეოთხედში კი ჯერამი გრანტმაც ფეხის ტრავმის გამო დატოვა მოედანი. უორიორსის სამქულიანები 5/29 იყო. სტეფენ კარიმ მუცლის კუნთის ტრავმის გამო ზედიზედ მეოთხე მატჩი გამოტოვა, დრეიმონდ გრინი კი იდაყვის ტრავმის გამო არ თამაშობდა. უორიორსმა გასვლითი სერია ხუთივე მატჩის წაგებით დაასრულა. მისი მაჩვენებელი 8-8-ია, გრიზლისისა კი 12-4.

ქართველები

ქართველები ამ ღამით არ თამაშობდნენ. გოგა ბითაძის მეჯიქი 21 ნოემბერს, თბილისის დროით 04:30-ზე, ბრუკლინში ნეტსს შეხვდება. სანდრო მამუკელაშვილის ლეიკერსი იმავე დღეს, 07:00-ზე, კინგსს უმასპინძლებს. ორივე მატჩი NBA-ს თასის ჯგუფურ ეტაპზე გაიმართება.

სანდრო მამუკელაშვილი · სტატისტიკაგოგა ბითაძე · სტატისტიკასტეფენ კარი · სტატისტიკაბრუკ ლოპესი · სტატისტიკადარიუს გარლენდი · სტატისტიკამაქს სტრუსი · სტატისტიკაJulian Champagnie · სტატისტიკავიქტორ ვემბანიამა · სტატისტიკასტეფონ კასლი · სტატისტიკაჯეილენ უელსი · სტატისტიკაკემ სპენსერი · სტატისტიკადილან ჰარპერი · სტატისტიკასედრიკ კოუარდი · სტატისტიკაკამერონ ბუზერი · სტატისტიკა გოლდენ სტეიტ უორიორსილოს ანჯელეს კლიპერსილოს ანჯელეს ლეიკერსიმემფის გრიზლისიორლანდო მეჯიქისან ანტონიო სპერსი

#გოლდენ სტეიტ უორიორსი #ლოს ანჯელეს ლეიკერსი #სან ანტონიო სპერსი #ორლანდო მეჯიქი #სანდრო მამუკელაშვილი #გოგა ბითაძე #ქართველები NBA-ში #ლოს ანჯელეს კლიპერსი #მემფის გრიზლისი #სტეფენ კარი #ვიქტორ ვემბანიამა #Julian Champagnie #სტეფონ კასლი #დილან ჰარპერი #მაქს სტრუსი #კამერონ ბუზერი #სედრიკ კოუარდი #დარიუს გარლენდი #კემ სპენსერი #ჯეილენ უელსი #ბრუკ ლოპესი

ასევე წაიკითხეთ