კალებ უილსონს ხელზე ოპერაცია ჩაუტარდა, მარკუს სმარტი კი სამ მატჩს გამოტოვებს

ბულსის ახალბედა კალებ უილსონს მარჯვენა ხელის მოტეხილობის გამო ოპერაცია ჩაუტარდა. კლუბის ცნობით, ოპერაცია წარმატებით დასრულდა და სამი კვირის შემდეგ მისი მდგომარეობა ხელახლა შეფასდება. სავარაუდოდ, უილსონი 4-6 კვირა არ ითამაშებს.

მარკუს სმარტი ჰიუსტონ როკეტსი · 2026-27 სეზონი 8.3 ქულა 2.6 მოხსნა 2.0 პასი პროფილი ›

უილსონმა ტრავმა სპერსთან მატჩის მესამე მეოთხედში მიიღო, როცა ვიქტორ ვემბანიამას ბურთის წართმევას ცდილობდა. მატჩი მან ვეღარ დაასრულა. ბულსი იმ მატჩში 22 ქულით იგებდა, მაგრამ 119:124 დამარცხდა.

20 წლის უილსონი 2026 წლის დრაფტის მეოთხე ნომერია. პირველ 10 მატჩში ის საშუალოდ 18.9 ქულას და 6.2 მოხსნას აგროვებდა. ბულსში ქულებით მხოლოდ ნორმან პაუელს ჩამორჩებოდა. ბულსის მაჩვენებელი 1-9-ია, გუნდმა ზედიზედ რვა მატჩი წააგო. შემდეგ მატჩს ბულსი შაბათს, 14 ნოემბერს, თბილისის დროით 05:00-ზე ჰოუქსთან ითამაშებს.

სმარტი სამი მატჩით დაისაჯა

NBA-მ რაკეტსის მცველი მარკუს სმარტი სამი მატჩით, ხელფასის გარეშე დასაჯა. სმარტმა უორიორსთან მატჩის მესამე მეოთხედის ბოლოს ჩარლზ ბასის მუშტი მოუქნია. დარტყმა ბასის ცხვირს შეეხო. სმარტს უხეში ფოლი მიუსაჯეს და მოედნიდან გააძევეს. ბასიმ სმარტის საქციელს „ყალბი სიმამაცე“ უწოდა.

სმარტი ვერ ითამაშებს ჯაზთან, უიზარდსთან და ჰიტთან. პირველი მათგანი შაბათს, 14 ნოემბერს, თბილისის დროით 05:30-ზე ჰიუსტონში გაიმართება. სმარტი რაკეტსში ზაფხულში გადავიდა და 9 მატჩში საშუალოდ 8.6 ქულას აგროვებს. რაკეტსის მაჩვენებელი 9-3-ია.