სტეფენ კარის 41 ქულა: 35 წლის ასაკის შემდეგ მე-16 40-ქულიანი მატჩი NBA-ის რეკორდია
38 წლის სტეფენ კარიმ მეჯიქთან 41 ქულა ჩააგდო და უორიორსს დამატებით დროში გამარჯვება მოუტანა. ეს მისი მე-16 40-ქულიანი მატჩია 35 წლის ასაკის შემდეგ: NBA-ის ისტორიაში ამდენი არავის აქვს.
უორიორსმა სან-ფრანცისკოში მეჯიქი დამატებით დროში 126:119 დაამარცხა. გადამწყვეტი სიტყვა სტეფენ კარის ეკუთვნოდა: 38 წლის გამთამაშებელმა 41 ქულა ჩააგდო (ტყორცნა 13/19, სამქულიანი 5/10, საჯარიმო 10/10), 6 ბურთი მოხსნა და 6 შედეგიანი გადაცემა შეასრულა. ეს მისი სეზონის საუკეთესო შედეგია.
სტეფენ კარი
გოლდენ სტეიტ უორიორსი · 2026-27 სეზონი
29.9 ქულა
3.7 მოხსნა
4.4 პასი
პროფილი ›
კარისთვის ეს 35 წლის ასაკის შემდეგ მე-16 მატჩია, რომელშიც მინიმუმ 40 ქულა ჩააგდო. NBA-ის ისტორიაში ეს საუკეთესო მაჩვენებელია: ლებრონ ჯეიმსს ასეთი 15 მატჩი აქვს, მაიკლ ჯორდანს კი 12.
გადამწყვეტი წუთები
პირველი ნახევრის შემდეგ უორიორსი 16 ქულით უსწრებდა (57:41), თუმცა მესამე მეოთხედში მეჯიქმა შედეგი შემოაბრუნა. ძირითადი დროის დასრულებამდე 25 წამით ადრე კარიმ უორიორსი წინ გაიყვანა, მაგრამ ჯამალ კეინმა ბოლო წამებში ანგარიში გაათანაბრა. დამატებით დროში კარიმ ჯერ ჩაგდებულ ბურთს საჯარიმო დაამატა და გუნდი წინ გაიყვანა, ბოლო წუთში კი კიდევ ორი ქულა ჩააგდო.
კარიმ ამ მატჩში კიდევ ერთი ისტორიული ზღვარი გადალახა: ის NBA-ის ისტორიაში მეშვიდე კალათბურთელია, რომელსაც კარიერაში 26 ათასი ქულა, 5 ათასი მოხსნა და 6 ათასი შედეგიანი გადაცემა აქვს.
უორიორსი ზედიზედ შვიდ მატჩს იგებს
სეზონი უორიორსმა სამი მარცხით დაიწყო, ახლა კი მისი შედეგი 7-3-ია. უორიორსს ზედიზედ შვიდი მოგება ბოლოს 2025 წლის მარტში ჰქონდა. კარიმ ბოლო ხუთი მატჩიდან ოთხში მინიმუმ 30 ქულა ჩააგდო.
ახალბედა იაქსელ ლენდებორგმა 23 ქულა და 8 მოხსნა დაამატა, დამატებით დროში კი მნიშვნელოვანი სამქულიანი ჩააგდო. დრეიმონდ გრინს სეზონის საუკეთესო 13 შედეგიანი გადაცემა აქვს, ბრენდინ პოჯემსკიმ კი 15 ქულა ჩააგდო. მეჯიქში ფრანც ვაგნერმა 30 ქულა და 11 შედეგიანი გადაცემა დააგროვა.
